वीरगञ्जमा तीव्र गतिका कारण कार दुर्घटना, एकको मृत्यु, तीनको अवस्था गम्भीर

वीरगञ्ज, २५ जेठ पर्सा । पर्सा जिल्लाको वीरगञ्ज महानगरपालिका–१४ पिपरास्थित लक्ष्मणवा चोक नजिकै आइतबार दिउँसो भएको कार दुर्घटनामा एक जनाको मृत्यु भएको छ भने तीन जना गम्भीर घाइते भएका छन्।

रेनुका पेट्रोल पम्प नजिक दिउँसो करिब ३:१० बजे गण्डकबाट बसपार्कतर्फ जाँदै गरेको बीआर ५५ बी ९१०४ नम्बरको भारतीय कार अनियन्त्रित भई सडकको डिभाइडरमा ठोक्किएको थियो। जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) सुवा भट्टका अनुसार दुर्घटना अत्यधिक तीव्र गतिमा भएकोले दुर्घटना भयावह बन्यो।

दुर्घटनामा परेका चारै जनालाई तत्काल बारास्थित एलएस न्युरो अस्पतालमा लगिएको थियो। तर, टाउको, मुख र कानमा गम्भीर चोट लागेका करिब ३० वर्षीय बिटु सर्राफलाई अस्पतालले दिउँसो ३:५० बजे मृत घोषित गरेको हो। अन्य तीन घाइतेको अवस्था पनि गम्भीर रहेको चिकित्सकहरूले बताएका छन्। प्रहरीले घटनाको अनुसन्धान थालेको जनाएको छ।