पर्सामा विपद् व्यवस्थापनको तयारीस्वरूप आगलागी नियन्त्रण अभ्यास सम्पन्न

वीरगञ्ज, २९ जेठ – आगलागी जस्ता विपद्‌जन्य घटनाको जोखिम न्यूनीकरण तथा प्रभावकारी नियन्त्रणका लागि पर्सा जिल्लामा आज विशेष अभ्यास कार्यक्रम सम्पन्न गरिएको छ।

जिल्ला प्रशासन कार्यालय पर्सा र मधेश प्रदेश विपद् व्यवस्थापन गुल्म, जनकपुर (हाल वीरगञ्ज) को संयुक्त आयोजनामा सम्पन्न उक्त कार्यक्रममा आगलागी नियन्त्रणमा प्रयोग हुने Fire Extinguisher को प्रयोग विधि सम्बन्धी प्रदर्शन तथा संयुक्त अभ्यास गरिएको थियो।

कार्यक्रममा जिल्ला प्रशासन कार्यालय पर्साबाट सि.प्र.अ.को कमाण्डमा ५५ जना, मधेश प्रदेश विपद् व्यवस्थापन गुल्म (जनकपुर) बाट जु.प्र.अ.का २५ जना, र स्थानीय समुदायका १५ जना गरी कुल ९५ जनाको सहभागिता रहेको थियो।

उक्त अभ्यासले आगलागी जस्ता आकस्मिक विपद्का बेला क्षति न्यूनीकरणमा सघाउ पुग्ने विश्वास लिइएको छ। सहभागीहरूलाई Fire Extinguisher को सही र सुरक्षित प्रयोग, सावधानी अपनाउने तरिका, तथा तत्काल प्रतिक्रिया दिने व्यवहारिक सीप प्रदान गरिएको आयोजकले जानकारी दिएका छन्।