नेपालमा पेट्रोल र डिजेलको मूल्य वृद्धि, भोलिदेखि लागू

काठमाडौँ, असार १ — नेपाल आयल निगमले भोलिदेखि लागू हुने गरी पेट्रोल र डिजेलको खुद्रा मूल्यमा वृद्धि गरेको छ। निगमले आइतबार साँझ प्रेस विज्ञप्ति जारी गर्दै पेट्रोलमा प्रतिलिटर १ रुपैयाँ र डिजेल तथा मट्टितेलमा प्रतिलिटर २ रुपैयाँ मूल्य बढाइएको जानकारी दिएको हो।

इण्डियन आयल कर्पोरेशन (IOC) बाट असार १ गते प्राप्त नयाँ मूल्य अनुसार पेट्रोलमा प्रतिलिटर १.४१ रुपैयाँ र डिजेलमा १.६७ रुपैयाँले खरिद मूल्य बढेर आएको निगमले जनाएको छ। यसै आधारमा निगम सञ्चालक समितिको निर्णयअनुसार मूल्य समायोजन गरिएको हो।

नयाँ मूल्य सोमवार (असार २) बिहानदेखि देशभर लागू हुनेछ। निगमले अन्तर्राष्ट्रिय बजारमा कच्चा तेलको मूल्य वृद्धि र भारतीय आयल कर्पोरेशनमार्फत आउने खरिद मूल्यमा भएको वृद्धिका कारण मूल्य समायोजन गर्नुपरेको स्पष्ट पारेको छ।