रौतहटमा सुटकेसभित्र भेटिएकी मृत महिलाको पहिचान खुल्यो,अनुसन्धान तीव्र

पर्सा, ८ भदौ, — रौतहटको गौर–सिरसिया सडकखण्डमा शनिबार राति सुटकेसभित्र मृत अवस्थामा फेला परेकी महिलाको सनाखत भएको छ। मृतक २६ वर्षीया रुबीकुमारी साह रहेको पुष्टि जिल्ला प्रहरी कार्यालय रौतहटले जनाएको छ।

डिएसपी राजु कार्कीका अनुसार रुबीकुमारी originally भारतको बिहार राज्यअन्तर्गत मुजफ्फरपुर घर भएकी हुन्। उनी हाल रौतहटको माधवनारायण नगरपालिका–२ माधवपुरस्थित माइती घरमा केही समयदेखि बस्दै आएकी थिइन्।

डेरा लिएर बस्दै आएकी थिइन्, एक छोरा पनि छन्

प्रहरीले दिएको जानकारीअनुसार, रुबीकुमारी करिब एक महिनाअघि देखि माधवपट्टीमा डेरा लिएर बस्दै आएकी थिइन्। उनीसँग एक छोरा पनि रहेको खुलाइएको छ।

सडक किनारमा सुटकेसभित्र शव, घाँटीमा डोरी र सल

शनिबार राति करिब साढे १० बजे गौर नगरपालिका–९ मुडवालगेट नजिकै शंकास्पद अवस्थामा सुटकेस भेटिएपछि प्रहरी टोलीले निगरानी थालेको थियो। आज बिहान खोल्दा, एक महिलाको शव सुटकेसभित्र अर्धनग्न अवस्थामा फेला परेको थियो। घाँटीमा डोरी र सल बेरिएको अवस्थामा शव भेटिएकोले प्रहरीले हत्या गरिएको हुन सक्ने आशंका गरेको छ।

आफन्तको उपस्थितिमा पहिचान

मृतकको माइती पक्ष र भारतबाट आएका आफन्तहरूको सहयोगमा उनको सनाखत गरिएको प्रहरी बताउँछ। घटनाको प्रकृति हेर्दा योजनाबद्ध हत्या भएको प्रारम्भिक अनुमान गरिएको छ भने, घटनाबारे विस्तृत अनुसन्धान जारी रहेको डिएसपी कार्कीले जानकारी दिए।