भाइटीका आज श्रद्धा र उल्लासका साथ मनाइँदै

पंचगावाँ । नेपालीहरूको दोस्रो ठूलो पर्व तिहारको मुख्य दिन आज भाइटीका श्रद्धा, आस्था र उल्लासका साथ मनाइँदैछ ।

दिदीबहिनीहरूले दाजुभाइलाई पञ्चरंगी टीका लगाइदिई दीर्घायु, आरोग्य र ऐश्वर्य प्राप्तिको कामना गर्दैछन् । दाजुभाइहरूले पनि दिदीबहिनीलाई टीका लगाइदिई दक्षिणा र उपहार प्रदान गर्ने परम्परा रहिआएको छ । शास्त्रीय मान्यता अनुसार दिदीबहिनीले पूजा गरेमा ऐश्वर्य प्राप्त हुन्छ भन्ने विश्वास रहेको छ ।

नेपाल पञ्चांग निर्णायक विकास समितिका अनुसार भाइटीकाको उत्तम साइत आज बिहान ११ बजेर ३९ मिनेटमा रहेको छ । समितिका अध्यक्ष प्राध्यापक शम्भु प्रसाद ढकालका अनुसार दिनभर टीका लगाउन कुनै बाधा छैन, तर राज्य सञ्चालकहरूले साइतमै टीका लगाउनुपर्ने परामर्श दिइएको छ ।

यस वर्ष तिथि वृद्धि भएकाले भाइटीका छैटौं दिन परेको समितिले जनाएको छ । यस दिन दिदीबहिनीहरू पूर्वतर्फ र दाजुभाइहरू पश्चिम फर्की टीका लगाउनुपर्छ भन्ने शास्त्रीय परम्परा रहेको छ, जसले शुभ फल प्रदान गर्ने विश्वास छ ।

धर्मशास्त्रविद् देवमणि भट्टराईका अनुसार तिहारको टीका सप्तरंगी होइन, पञ्चरंगी हुनुपर्छ—रातो, सेतो, पहेंलो, हरियो र नीलो गरी पाँच रङको टीका प्रयोग गर्नुपर्ने उल्लेख छ । टीका लगाइसकेपछि दिदीबहिनीले दाजुभाइलाई ओखर, कटुस, मसला र सेलरोटी जस्ता परिकार दिने तथा दाजुभाइले सौभाग्यका प्रतीक कपडा र दक्षिणा प्रदान गर्ने धार्मिक र सामाजिक परम्परा रहिआएको छ ।